Pantun Peransang Ngangkatka Jaku Iban

      "Bansa kitai Iban chukup kaya enggau pengeraja bansa kelebih agi ari tukuh litaricha ke ulih dikumbai kitai nadai dikembuan bansa bukai. Siti ari pesaka litaricha kitai iya nya Pantun. Pantun tu sebengkah ari main asal kitai Iban ke dikemain enggau pemanah serenggut nyawa lalu suah dikena orang merindang ati lebuh Iban bebunggah numi pengabang ngirup tuak maya bisi pengerami baka maya gawai (Jimmy Donald, 1993). Orang ti bepantun tu enda milih sekalika indu tauka lelaki, asal iya landik ngerintai leka jaku sereta nemu yiur nyawa pantun. 

       Nyadi sekali tu aku deka bekunsi enggau kita siti ari bansa pantun ti bisi dikembuan kitai Iban iya nya Pantun Peransang. Pantun Peransang tu sebansa pantun ti dikena orang meransang siku-siku orang nya ngereja pengawa sereta muji utai ke udah digaga iya nyentukka pengawa dipejalai iya nya mujur. Pantun Peransang tu asil tengkebang siku ari Pengajar Pelatih IPG Kampus Rajang ke ngambi opsyen Jaku Iban lalu diseleti Pengelicha Ngabong Katoi iya nya pengelicha Jaku Iban. Pantun tu disadaka Umang Roslina Lulut enggau Igat Gabriel Guret lebuh pengawa Malam Budaya ti diatur ba Dewan Stephen Kalong Ningkan, Betong beserimbai enggau pengawa Semiar Budaya Iban 2015 nyin kemari."

Umang Roslina seduai Igat Gabriel lebuh nyadaka pantun peransang tu ba mua bala mayuh.

Pantun Peransang Ngangkatka Jaku Iban

Ditengkebang: Erica Leenya Anak Eben (PISMP Bahasa Iban Januari 2014)

Diseleti: En. Ngabong Katoi (Pengelicha Jaku Iban IPG Kampus Rajang)

Aih… remba se.. remba,

Nadai enda ngemadas nya aku meda balai tu wai menyadi rintai kerusi raban mija,

Lampu karan nyau melan-melan baka bulan tengan peranama,

Perabung nyau jendung-jendung baka tuchung menyaung Bukit Lingga,

Kipas nyau bepulas baka upas bilun helikapter,

Dinding nyau perenching panchar kuning api chaya,

Lantai manah amai baka ruai lapik tikai nadai me..ranggang.

Aih… uji anang guai chapuh dulu orang mayuh ke datai ari jauh genap menua

Anang guai dulu randau bukai kita ke besai tuai ke betunga mua ngelinggi mija,

Uji dek Ranggau Keling mendingka tubuh ramping kami dua nerantingka suling ruding temaga,

Tubuh jempayah aku nebah sanggah dilah sura dabung nyawa,

Laban tubuh lempang kami dua tu deka ngenang jaku Iban kena sengang gelumbang pe…mansang.

Aih… kitai Iban diatu menyadi sidan nyau mayuh leman macham cherita,

Sekumbang tanah ke udah berubah selampur menua,

Sekumbang menua nyau bisi menira lambang bunga raya,

Orang laki ambis ke nengeri ngiga kereja,

Diau di menua ngasuh tusah laban getah pera enda chukup rega,

Orang ke indu nyau enggai agi nyau nadai agi bekejengu bepangku ke rambu ubung jera,

Pengarap lama nya dih aka nyau dilengka baka gari perecha penyapu mua,

Pengarap baru enda ga tentu nyengala nemu, ta sebubu tuku enda segala,

Nya dih ngasuh adat kitai bisi tesat, jaku nyadi keru tinggal di be…lakang.

Aih… Jaku Iban sempama pesaka benda menaga,

Enda ulih diganti kitai asi ngena peti emas pemata,

Nyema lesi pesaka berega punas mih sekayu bansa,

Ta baka ke ngumba kami dua wai nunga kita bala pemesai menua,

Ta luba luba nganaka pengasai ati ti chukup….lantang.

Aih… angkat ta datai nemuai bala pemesai matau menua,

Datai sangkai ba pendai kitai seraya ngemai cherita tuai,

Kena kitai ngiri purih ngansah pemandai,

Beterigah tuai rumah gaga semua-mua nerima sida,

Berengkah mih sida Rajah merintah menua mai pe…mansang.

Aih… ta diangkatka sida iya ga pesaka bansa, nyadi Lingua Franca,

Dikena lebuh merintah menua, ngenataika berita,

Lalu didirika sida sekula dikena nempa anak bansa,

Ngiri bujang dara ngena penemu berega,

Ngichaka ila ulih megai menua bansa awakka enda….lelang.

Aih… indah baka panas enda dataika lemai ,

Jaku Iban kitai nyu enda ngerekai,

BLB di tunu api nyerarai nabanka pesaka tuai sulai,

Jaku Iban ke baru deka nyumbuk ngerembai,

Tasal laban ati ke balat kepapas utai,

Lemambang kitai berengkah lesi sulai,

Nadai agi orang ngerandang jalai,

Lesap mih adat nyaya mih basa kitai,

Lela sulai pulai ke Tansang Burung Ruai,

Lenyau mabun laya nitihka aki ini kitai ke…. Sulai.

Aih… taja antu buyu gila tuyu munuh jaku nesatka adat basa,

Dia ta tegah sida Tun Jugah Foundation ke gagah besai kuasa,

Nirika palan nyadi pengkalan endur Iban ngenanka pesaka,

Nyadika tenggau nembiak redak awakka enda merampau mamau pengidup pu…ang.

Aih.. dia dih bala pemesai menua tebuka ati sida,

Ngemendarka Jaku Iban  betansang ba IPG Kampus Rajang rinda,

Ke ngembuan bala pengelicha ke chukup bekuasa ngemansangka jaku bansa,

Iya nya bala sida pengelicha Mamat, Philip, Ngabong, Corella,

Orang ke chukup angkun sereta dikarapka kami menyadi semua,

Ke disukung perintah menua sereta bala ti besai kuasa,

Enda tinggal mega ngagai Tuan Raymond Gai ke seruran meri pe… ransang.

Aih…ketegal Petara ti seruran ngemata anak bansa,

Dia ta diturunka iya siku anak mensia ke chukup geliga,

Iya ke selalu mansutka penemu dalam pelajar sekula pemansang bansa,

Iya ke enda kala leju ngansak anak bansa pandai sekula tebilang serata dunya,

Enda kala ati dua meri duit reta tengkira ke bala kitai semua,

Ketegal ati iya ti chukup angkunka pemesai guna Jaku Iban ke ulih ngangkatka bansa,

Terima kasih nuju nuan Datuk Amar Afred Jabu ke nyadi pematak jalai nuju pe...mansang.

Aih… bala kami ke rebak dudi tu Tan Sri ti dipebasa,

Minta berekat minta sukung ari nuan wai Tan Sri awakka kami tegut bediri serata dunya,

Saum seati ngulihka Degree ngambi Master nyadi Professor,

Ngichaka kami ila baka nuan tebilang nama ngemansangka bansa jelai rita,

Ngenanka Jaku Iban awakka meruan seruran… mansang.

    

Pansik Senentang Standardisasyen Jaku Iban

Ngelala Ngepan Iban (Jaku Iban Primari 6: Unit 4)

Pesaka Menua Malaysia

Menua kitai Malaysia benung bendar ngemansangka diri nyadi siti ari menua ti pemadu maju ngambika ulih ngangkat ke diri lalu nyingkang sereta enggau menua-menua bukai ke udah dulu nyepi pemansang dunya. Taja pan menua udah kala diperintah bansa bukai sepengelama 446 taun, tang menua kitai majak mansang semansang lalu diatu menua kitai udah sama bela peninggi enggau menua bukai enti nyema pemansang nya ulih disukat enggau kayu penyukat. Menua kitai chukup nyulut dalam bemacham-macham langkar pengawa antarabansa baka main, pelajar, pekit, enggau mayuh agi. Kelimpah ari nya, menua kitai mega agi bisi ngembuan mayuh macham pekara ti tau narit ati bala temuai ari menua tasik datai nemuai ke menua kitai. Menua kitai endang masai ditapatka bala temuai ketegal menua kitai agi ngembuan pemanah rampa menua ti enda ulih disemaka enggau pemanah rampa menua bukai sereta mayuh agi utai bukai ti chukup narit ati temuai datai ke Malaysia. Kitai ulih beratika ninting taun penyampau bala temuai ari menua tasik ti datai nemuai ke menua kitai endang majak nambah. Penatai bala temuai tu mega meri asil ngagai penatai pemisi menua kitai nengah industri dagang temuai.

            Siti ari kebuah ti ngujungka bala temuai rindu amat nemuai ke menua kitai ianya pemanah adat basa bansa kitai Malaysia. Kitai sama nemu, bansa kitai tampak rita ketegal pemanah adat basa ti chukup tinggi, gerah jari sereta sama bela bebasa ke pangan diri. Ari dulu kelia, bansa Malaysia sigi ngembuan adat basa ke tinggi sereta enda kala renjan jaku enggau pangan diri lebih-lebih agi enggau bala temuai ari menua bukai. Ambi ke chunto, temuai ti datai nemuai ke menua kitai sigi tetap disambut enggau gaga ati sereta penuh enggau adat basa lalu tu ngujungka bala temuai chelap ati sereta rindu ka adat basa ti dikembuan rayat Malaysia. Semua rayat di menua kitai sigi nyambut penatai bala temuai enda ngira ari menua ni sida datai. Orang ke gawa ba  industri dagang temuai baka gawa ba hotel, deriba van pengangkut tauka van sewa, deriba perau, nyadi malin temuai, gawa ba restoran tauka kulau sereta mayuh agi sigi endang udah dilatih bebasa ke bala temuai sereta semampai diasuh meri tuchum ngagai bala temuai ngambika ulih meri imej menua Malaysia ti diuan rayat ti kemerah sereta bebasa. Perintah menua Malaysia mega chukup ngelaluka penatai bala temuai ke menua kitai nyentukka perintah ngadaka siti program ke nyemetak bendar ianya ‘Program Nemuai ke Malaysia’ tauka “Visit Malaysia” ti berambai ke jaku “Malaysia The Truly Asia”. Maya program tu dilancharka, bala temuai diperindang enggau mayuh macham tanda asal semua bansa ti bisi ba Malaysia ti betemaka “Citrawarna Malaysia.”

            Kelimpah ari nya, pemayuh raban pupu bansa ba menua kitai mega narit ati bala temuai datai nemuai ke menua kitai. Sida ransing ati deka nemu pun penyerakup bansa Malaysia ti ngembuan mayuh pupu raban bansa ti bebida adat enggau ugama. Malaysia chukup nyelai ari semua menua ti bisi ba dunya tu ketegal semina Malaysia aja ti ulih mansang sereta chukup likun taja pan rayat bebida bansa. Ambi ke banding, nengeri Sarawak aja udah ngembuan 35 etnik tang sampai sahari tu nengeri Sarawak tetap likun sereta rayat Sarawak enda kala besengki enggau pangan diri. Enda salah munyi sempama Iban, adat napang bekunsi rintung, adat ngasu bebagi semeliung. Ketegal pemayuh pupu raban bansa, menua kitai ngembuan mayuh bengkah pengerami ti diintu dalam setaun baka Hari Gawai, Hari Raya Aidilfitri, Tahun Baru Cina, Deepavali, Pesta Keamatan sereta mayuh agi pengerami pupu raban bansa bukai ti bisi ba Malaysia. 

Pengerami ti nyelai ari menua bukai tu meh ti narit ati bala temuai ari menua tasik datai nemuai ke menua kitai ketegal maya tu meh sida nyepi pemakai rayat menua kitai baka pansuh, ketupat, pulut, rendang enggau mayuh agi ti galak amat dipuji sida ketegal penyamai enggau chara nyediaka pemakai ti chukup nyelai ba mata sida. Tambah mega, asil pengelandik jari rayat Malaysia balat narit ati bala temuai ti datai nyentukka sida berambis duit meli asil pengelandik jari kitai baka tenun, pua kumbu, tikai bidai, lanji, timpa raga, pasu, sumpit, ilang, marik, tanggui tauka tanggi, perengka ke diukir, sape, manik enggau mayuh agi asil pengelandik jari bukai ngambika bisi bai sida pulai ke menua sida lalu nyadika tanda pengingat sida ke menua kitai.

            Menua kita mega agi ngembuan pemanah rampa menua ti nadai ulih dipekit enggau menua bukai. Kebuah pia laban menua kitai siti ari menua ti agi ngembuan kampung tuai. Bala temuai ari menua tasik tetarik amat ati enggau pemanah rampa menua ti bisi dikembuan kitai. Menua kitai Malaysia mega udah bulih bantu ari “World Wild Fund (WWF)” ngambika bisi dikena kita ngintu sereta nyaga kampung tuai ti bisi ba menua kitai. Menua kitai agi bisi ngembuan kampung jerung ti bungas dikena nyaga pesaka menua kitai ke paling berega ketegal ngundan mayuh macham flora enggau fauna ti nyelai sereta enda ulih ditemu ba menua bukai. Kitai bisi bungai ti pemadu besai ba dunya ianya Rafflesia, mayas, rasung, empeliau, chemaru enggau mayuh agi bansa flora enggau fauna ti bukai. 

Kampung kitai mega ngembuan mayuh macham kayu ti berega baka tebelian ti sengaja dijaga perintah ngambika enda lus ditelan pemansang dunya ti majak mansang sereta nadai pentin. Kelimpah ari nya, kitai bisi bukit ti tinggi baka Gunung Kinabalu ti ulih nyadika palan endur bala temuai ngujika pengering sereta ngulihka peneleba. Ai wung ti bisi ba menua kitai mega manah endur ngelantangka ati laban ai ti chiru sereta beresi. Kitai mega bisi tebing tasik ti beresi sereta nyamai endur memarin. Tebing tasik ba menua kitai ti chukup tebilang ba serata dunya baka Port Dickson, Pulau Sipadan, Pulau Langkawi, Pulau Kapas, Pulau Tioman enggau Pantai Batu Buruk. Temuai ari menua tasik rindu amat nyelam ba tasik menua kitai ketegal kitai ngembuan batu karang, ikan ti bemacham-macham chura ba tasik dalam sereta tasik kitai chukup beresi. Bisi sekeda nengeri ba menua kitai mega udah dipilih nyadi palan besejarah dunya ti diiktiraf UNESCO baka nengeri Melaka enggau Georgetown ba nengeri Pulau Pinang. Dua bengkah nengeri ti mayuh ngembuan palan-palan ti chukup besejarah ti mai besai reti ngagai menua kitai. Pia mega, Gua Niah ba Miri Sarawak mega suah amat dilawa bala temuai ketegal Gua Niah tu siti ari palan endur pun penatai asal kitai mensia bejuta taun ti dulu sereta gua ti pemadu besai ba dunya.

            Menua kitai Malaysia siti ari menua ti likun sereta nadai kala bisi penyarut ti tusah bendar ti tau ngujungka nyawa bebadi ketegal pemerintah menua kitai chakah bendar nyaga pengelikun menua. Rayat menua tu mega sama bela bebasaka undang-undang ti udah diatur perintah. Nya alai semua rayat menua tu sigi begulai sejalai, saum seati, taluk ke pangan diri ketegal bisi penyerakup ti udah dikembuan ari pun siku-siku nya ada. Ketegal pengelikun menua kitai, bansa bukai chukup bebasa amat ke menua kitai. Ambi ke banding, ba gerempung antarabansa baka PBB, menua Malaysia sigi dibasaka menua bukai nyentukka Malaysia diberi basa nyadi tuai lebuh maya baum. Enti nyema kitai nadai kaul ati ti tegut enggau pangan diri, menua kitai sigi enda likun baka ke dipeda kita sahari tu lalu rayat deka merinsa baka ke ulih dipeda kitai ba menua bukai ke benung charut sehari tu ketegal pemerintah sama bela berebut ke kuasa sereta enggai ngalah ke pangan diri. 

Rayat menua ke charut tu ulih disempamaka kitai baka rampu begulai enggau rian. Ka ngelaban enda ulih tang enti ditat merinsa amat. Rayat Malaysia chukup beruntung ketegal menua kitai enda kala charut sereta nadai penusah ngenyit tauka gelana dunya nyadi ngelama tu. Enti kitai beratika menua bukai baka menua Jipun, rayat menua nya selalu bendar teguran ati lalu pendiau sida sempamaka diau ba baruh punggu ketegal suah bendar nyadi penusah ngenyit tauka baka gelana dunya baka tsunami ke udah mangka menua Jipun bulan Mac 2011 tu tadi. Berindik ari nya, semua rayat patut nyaga pengelikun menua sereta sanggup berambun nyawa ngenanka pengelikun menua kitai enda salah munyi sempama biar munggu nyadi emperan, biar tebing dulu maring nyadi kerangan asal aja menua kitai enda dituntung penusah ti tau ngujungka menua kitai pechah belah lalu meri penguntung ngagai orang bukai sempama kapal pechah, yu kenyang.

            Kelimpah ari nya mega, rayat menua Malaysia ti mayuh pupu raban bansa mega ngembuan mayuh macham adat lama ti nyelai ti enda ulih dipeda ba menua bukai ti bisi ba dunya tu. Semua adat asal tiap iti bansa baka tanda, adat emlah pinag, main asal sereta mayuh agi adat lama sigi enda kala dilengka taja pan dunya diatu majak mansang. Anembiak rebak baru sigi semampai ngintu sereta nyaga adat lama ke ditinggal ke bala aki ini kelia enda salah munyi ko sempama baka rutan tampung danan, baka ijuk tampung penduk, baka wi tampung tali ngambika adat lama siti-siti bansa tu enda lenyau ditelan pemansang. Berindik ari pemayuh pupu raban bansa ti bisi ba menua kitai tu, rayat Malaysia bekunsi mayuh macham main asal baka tanda kajat Iban, tanda Zapin, tanda singa, tanda bharatanayam, tanda sumazau sereta mayuh agi. Taja pan bebida pupu raban bansa, rayat Malaysia chukup rindu belajarka main asal bansa bukai. Ukai pekara ti nyelai enti lebuh kitai meda raban bansa cina nemu ngajat lebuh maya Iban begawai, raban bansa Melayu nemu betanda sumazau lebuh maya Pesta Keamatan sereta raban bansa kitai, bansa Iban nemu betanda zapin. Tu meh pekara ti chukup narit ati bala temuai ari menua tasik ketegal sida enda kala tetemuka rayat siti-siti menua ti sama bela nemu main asal bansa bukai kelimpah ari main asal bansa diri. Kelimpah ari nya mega, tiap-tiap raban bansa ba menua kitai tu ngembuan pekayan asal bansa baka ngepan, baju kurung, sare, cheongsam, dhoti, enggau mayuh agi. Bala temuai ari menua bukai rindu amat nguji ngena pekayan asal pupu raban bansa Malaysia ketegal manah sereta nadai kala dipeda sida ba menua sida empu. Sida temuai chukup ransing ati belajarka adat asal menua kitai ngambika bisi dikunsi sida enggau bala bakih sida.

            Kena nyimpul ka semua nya, semua rayat patut sama-sama nyaga semua kampung tuai, adat basa, main asal, enggau pengelikun menua awakka menua kitai semampai tampak rita ba serata dunya. Temuai mega endang sigi agi belala nemuai ngagai menua kitai ngujungka sida nemuai sekali empai berentak tang agi ka ditapatka temuai baru jemah ila. Tambah nya mega, industri dagang temuai sigi ngundan asil ti mayuh ngagai penatai pemisi menua kitai. Enti kelia, nitihka pengarap bala aki ini kitai, penatai bala temuai tau mai laba. Penatai sida temuai tu enda nyalah-nyah munyi sempama laba anjung burung, antu bisi ngarung. Nya alai, kitai patut nyambut penatai bala temuai enggau gaga ati awakka bala temuai ke datai nemuai ke menua kitai sigi berasai tepantup ati sereta puas bendar ati nemuai ngagai menua kitai. Bepelasarka semua pemanah menua Malaysia ti udah dirintai aku tadi, kitai patut angkunka menua kitai tu sereta temegah ati laban udah ada nyadi siku ari anak Malaysia. Pelaba aku, mayuh bansa bukai sanggup betunggang lupung sereta bekikis bulu betis, bebuai bulu gundai deka nyadi rayat Malaysia. Nya alai, kitai patut nyaga semua pengaya sereta pengeraja di menua kitai awakka menua kitai majak nyulut ba mata dunya sereta nyadika chunto ngagai menua bukai awakka menua bukai bebasaka menua Malaysia nyadi siti ari menua ti pemadu nyulut ba dunya. Kepenudi iya, semua rayat Malaysia patut begerempung enggau perintah ngetan ke menua kitai sereta ngiga instrument ke engkeman bendar dikena ngemansangka agi menua kitai dalam semua langkar pemansang dunya ngambika menua Malaysia semampai tebilang, nyulut sereta gemilang.

**Esei tu udah mujur bulih lumur tiga ba Pekit Ngarang Esei (Kategori Berpan) SDNU Renggat Nengeri Sarawak ti diatur beserimbai enggau Forum Jaku Iban 2011 suba.**

1 Malaysia: Rayat Diseridi, Pemujur Dipelemati

Baka ke udah ditemu kitai, menua kitai Malaysia tu endang mayuh raban pupu bansa. Antara raban bansa ti majoriti ba menua tu nya Melayu, Cina enggau India. Nyadi, kitai rayat Malaysia tu patut ngambu diri nyadi raban bansa ti nemu bepikir sereta bepadu nuju siti juluk ati menua. Enggau nya, kaul antara kitai ulih dikemansangka agi ngambika menua kitai Malaysia tu majak maju, likun sereta meruan.

            Kebendar iya, konsep 1 Malaysia tu diperambu YAB Dato’ Sri Najib Tun Abdul Razak, nya Kepala Menteri Malaysia ke diatu amat betul sereta ngam enggau asai ati rayat. Konsep tu mega sebaka enggau batang pekara ke ba Perlebagaan Persekutuan sereta Prinsip-prinsip Rukun Negara. Kelimpah ari nya, 1 Malaysia tu mega nyadika juluk ati dikena ngerapitka agi kaul antara rayat. Batang pekara ti patut dalam idup begerempung tu nya bebasaka orang, lurus ati sereta arapka bansa bukai. 1 Malaysia mega ulih dikemansangka menua ti angkunka utai dijapai ke bepelasarka pemansang rayat, sebaka enggau rambai jaku YAB Kepala Menteri nya ‘ Rayat Diseridi, Pemujur Dipelemati’.

            1 Malaysia mega begunaka pemegai perintah sereta rayat di bepikir jauh. Ulah ti lurus ati, landik, enda bula, taluk sereta manah ati amat beguna dikena ngemujurka tanggung pengawa ngagai menua. 1 Malaysia tu mega amat begunaka bala raban perintah ke landik ngatur sereta meretika semua pengawa ti diberika ngagai sida. Raban perintah ti lati sereta komited patut ngembuan pengelandik ti tinggi dalam merambu, ngatur strategi sereta nitihka jam lebuh maya gawa ngambika sida ulih meri penyaup ke orang bukai. Bagas sereta rinduka pengawa enggau tanggung pengawa mega nyadika batang pekara ke paling patut dalam semua pemujur. Pia mega menua kitai tu amat begunaka menteri ti rinduka mensia mayuh, sanggup gawa lebih jam, regas, sereta sanggup meri reta baka duit ngagai menua Malaysia. Nya kebuah perintah ti gawa enggau manah sereta mentas patut bulih sukung ti manah ari rayat.

            Kelimpah ari nya mega, bala mensia mayuh patut taluk ngagai menua ngambika kitai ulih begulai enggau manah sereta likun. Menua Malaysia tu ungkup kitai magang, enda ngira bansa, pengarap, adat enggau polisi politik. Semua kitai patut ngasaika semua pemansang menua kitai sama-sama. Nya alai, semua kitai diperansang meretika lapan pekara ti besangkut paut enggau 1 Malaysia. Enti kitai sama begerempung enggau pangan diri, nadai kebuah kitai patut ngasaika penyenang menua. Kitai patut seati ngambika semua utai ti dituju ati ulih dijapai. Enda patut ga kitai ka nganti bulan labuh ba tapa.

Ngambika kita nemu, konsep 1 Malaysia tu nadai reti deka ngiarka tuju afirmatif, tuju dikena mantu bala Bumiputera, amat meh tuju nya dipejalaika enggau chara ti betul sereta asi laban sekeda raban Bumiputera patut bulih utai ke dipinta sida ngagai perintah. Nambahka nya mega, rayat mega diansak ngaga siti-siti pekara ti lebih ari adan etnik enggau bansa. Raban bansa Melayu tu nyadika chunto dipinta ngambika sida ukai semina bepikir dalam skop bansa sida aja. Sida mega dipinta awakka enda ngenyati raban bansa bukai nitihka peneka ati sida iya. Rayat raban bansa bukai mega diajar ambika ngaga pekara ti sama. Perintah mega endang semampai kiruhka sereta meri semua utai ke dipinta rayat,bansa enggau etnik ba Malaysia. Pekara tu udah dikemeranka berengkah ari menua tu ke udah merdeka suba. Utai tu mujur nitihka chara diri empu sereta perintah deka kiruh enggau semua peminta rayat.

            Kebendar iya, konsep tu amat manah, pia mega enggau Kepala Menteri kitai. Kepala Menteri tu udah ngemansangka mayuh raban bala ke suntuk ba menua pesisir. Iya mega nitihka singkang niang apai iya ti chukup mentas enggau rayat. Ambika chunto, seduai iya udah mayuh ngemansangka menua kitai Sarawak tu. Kepala Menteri kitai tu mega udah meri mayuh amat projek pemansang ngagai menua pesisir baka ba Sabah enggau Sarawak. Enggau projek ti diberi iya ngagai kitai, dia kitai ulih ngasaika penyenang ti sebaka enggau orang ba menua besai. Iya mega gawa enda merening bansa, adat enggau pengarap siku-siku mensia. Nya alai, konsep 1 Malaysia tu meri peransang dikena ngerapitka agi kaul antara rayat baka ke udah disebut ba Prinsip Rukun Negara. Pkara ti patut bisi dalam idup bepadu nya rinduka mensia mayuh sereta sama bela arapka pangan diri antara raban bansa. Rayat patut taluk ke menua diri lebuh maya meretika sereta bejalaika tiap-tiap pengawa.

            Kepenudi iya, semua kitai patut ngambu diri raban menua Malaysia ke alai kitai patut ngasaika semua penyenang enggau pengelantang tu sama-sama. Pemujur pupu raban bansa ba menua kitai Malaysia tu amat patut nyadika chunto awakka raban rebak baru ulih ngemansangka agi menua tu. Ila, menua kitai tu dipuji orang menua bukai enti kitai udah maju bendar. Rayat ke udah mujur mega patut bekunsika mayuh macham pekara ukai semina informesyen sereta modal tang mega adat enggau pengarap ari menua bukai. Semua rayat Malaysia patut meretika prinsip 1 Malaysia nya ‘kekitaan (togetherness)’ sereta ‘kekitaan (sense of belonging)’ ngambika semua utai tu mujur dipejalaika nitih semua ti udah diperambu kitai.

**Esei Kenegaraan 2010

Ngepan Iban

Ngepan ke dikena maya sesebengkah pengawa, ngayanka identiti ke besai reti sekalika ba adat tauka main asal sesebengkah peturun ukai semina ba Iban tang bansa bukai. Lebuh maya bisi pekit baka Kumang Gawai tauka pekit bukai, pengawa indu ke ngepan bekenaka baju tradisional mayuh ngundan perengka ias, ari sugu tinggi datai ngagai gelang kaki. Taja pia, enda mayuh indu diatu nemu bagi perengka ias ke betul dikena tauka chara ke betul lebuh ngena ngepan Iban. Kurator Muzium, Tun Jugah Foundation, Janet Rata Noel madah, Ngepan Iban mandangka identiti adat. Tiap etnik bisi chara ngena ngepan bansa diri. Ngepan Iban dianggap reta pesaka kitai. Nya mih pesaka kitai nyentuk ke jemah ila. Nya alai, iya patut dijaga enggau manah.

Dulu kelia, bansa Iban ngaga kain baju kediri tauka gari bukai sereta rengka ias bukai. Bansa Iban kelia ngena asil ari babas, baka kulit temeran ari kayu tekalung ti ditenchang datai ke iya alus besabut kena ngaga sirat tauka baju tekalung. Asil bukai ari babas ke kena ngaga gari sereta perengka ias baka rutan, bansa paku, ikan tauka tisik jelu baka tengiling, tekuyung sereta kulit jelu bukai. Bisi sekeda bansa Iban nanam taya ngambi bisi dikena ngaga kapas nyadi benang (ubung) dikena betenun. Maya nya, gari ti dikena sida muntang aja sereta enda mayuh macham ulih giga.

Diatu dunya majak mansang, kitai pan muntang ngiga macham bansa gari tauka ngepan bukai, lalu ngujungka bansa ngepan Iban pan mayuh chara ulih gaga nitihka peneka tauka pemisi diri. Taja pia, sekeda perengka mega majak mar digiga baka perengka ias pirak, marik lama sereta bulu burung kenyalang tauka ruai. Berindik ari nya, kitai pan nyau ngiga chara bukai nganti perengka ias digaga ari aluminium.

Ba pengawa pekit Kumang Gawai, ngepan penuh ke betul dikena nitihka sesebengkah ai. Ngepan ke chukup tauka penuh nyengkaum sugu tinggi pirak enggau perengka ias pirak bukai baka lampit, rawai, nyawir sereta buah pauh tauka chelapa. Lalu kain ke patut dikena, iya nya kain kebat, anyam tauka sungkit ke anang kelalu pandak (dua tauka tiga inchi baruh pala patung). Enti sema beselampai, iya patut chukup panjai nutup punggung ke baruh, lalu ngena baju lengan pandak baka baju burung, baruh marik empang tauka baju kuas).

            Ketegal pemansang ti majak neruju kemaya hari, ngepan asal kitai Iban semakin hari nyau majak lesi penulin iya. Enti utai tu enda diputarka kitai enggau lengkas, iya tau mai empas ti enda manah ngagai bansa kitai jemah ila.

Kereban Audio Visual (Pemanah Nyaga Rampa Menua)

Animasyen Nyepil Enggau Macha Jaku Iban

Animasyen Nyepil Enggau Macha Jaku Iban from Erica Leenya

Kereban Audio-Visual (Ensera Anak Mit)

/

Penyerakup Raban Bansa Nengah Litaricha Enggau Leka Main

          Litaricha enggau main asal Iban tu siti ari identiti kitai bansa Iban ti ngasuh kitai jauh ngelui ari segi asil litaricha enggau pengaya jaku raban bansa bukai. Jarang bansa bukai ke enda muji raban bansa kitai Iban laban ngembuan pengelandik ngena sereta ngaga leka jaku ke setimbal dalam main kena betundi tauka dikena dalam pengawa rama sereta pengerami baka melah pinang tauka pengerami bukai ba rumah panjai. Kitai Iban ngembuuan mayuh bansa main asal benyawa ke ngena tusun jaku ke setimbal sama semunyi dalam mayuh bengkah Pengap, Renung, Ganu, Sanggai, Pantun, Timang Jalung, Timang Kenyalang sereta Timang bukai, Sugi, Dungai, Jawang, Ramban, Pelandai, Sabak, Pelian enggau sekeda main asal bukai. Main asal bukai ke enda ngena nyawa nya baka Sampi, Biau, Ai Ansah, Geliga, Entelah enggau utai bukai.

            Litaricha enggau main asal sigi ditengkebang ukai semina nyadika seni meala-ala neresa jaku Iban tang mega nyadika rengka dikena dalam pengidup besehari-sehari lalu kereban litaricha tu mih ngempung bansa kitai Iban ngasuh kitai beserakup dalam pengidup. Iya ukai semina nyerakupka penemu tang nyerakupka kitai bansa sechara selangkuh tubuh (fizikal). Pesaka bansa kitai tu mega ukai semina nyadi kereban pemerindang meala-ala dikena ngenatka diri belelak tang iya endang nyadi rengka dikena ngulihka lalau tenggau dalam peneleba pengidup kitai Iban ninting ari. Bansa Iban ukai semina tau dikelala orang bansa bukai ketegal pementas, basa, pengiruh enggau pemerani dalam semua pengawa tang pengelala kitai mega tebantai ari penyelai enggau pengaya daya idup baka leka main, adat basa, pengarap enggau main asal.

            Main asal Iban dibagi ngagai tiga bansa tauka kategori iya nya Leka Main Beperindang, Leka Main Adat Basa enggau Leka Main Invokasyen. Leka Main Beperindang nya leka main ti dikena merindang ngelantangka ati, bungah, muji, ngelugi enggau ngelangkung. Kelia menya, lebuh apin maya bisi radio enggau tibi sereta teknologi ti bukai, bansa kitai Iban deka begelumu ninga leka main maya lemai hari tauka lebuh bisi awak dikena merindangka pangan diri. Tu mih chara bala kitai Iban nyerakupka kaul enggau pangan. Bala nembiak dia maya hari nyelinting lemai, udah mandi makai semua indah, sigi begempuru duduk begelumu ba ruai nganti sida ke tuai nusi ensera. Ensera tu siti ari main asal bepemerindang kitai Iban. Ensera ditusi pia aja enda benyawa, lalu enti iya ditusui ngena chara benyawa (dikana), dia ensera tu lalu dikumbai orang Pelandai. Pengawa begelumu bala mayuh ba ruai nyengkaum bala nembiak ke baka tu meri kaul ti rat entara nembiak redak rumah panjai nya. Tu ti ngujungka sekayu rumah nya besaum ati enggau pangan diri.

            Dalam kelas Main Asal Adat Basa, leka main tu dikena lebuh maya bisi pengerami  gawai baka pengawa melah pinang sereta pengerami ke bukai. Adat basa nya tikas peninggi asil intelektual dalam batang pengidup tauka daya idup bansa Iban laban daya idup kitai bansa Iban suah bendar dipancharka ari penalam runding, peninggi ada, pengalus budi, pementas basa enggau pemai ulah ti manah. Chara dikena mantaika ukur tu suah dirintai tauka dikereja ngena leka main baka sida Geliga, Renung Adat, Dungai, Pantun Puji, Kujuk Panggang, Tanya Indu, Ambi Laki, Nan/Muka Kuta enggau ti bukai. Leka main kategori tu tampak amat nyadika pengelala enggau penulin diri, bansa ti tegap nanka daya idup raban bansa kitai. Ari leka main adat basa tu, kitai nunjukka penyiru, pemanah, pengiruh sereta pengerindu kitai ngagai orang bukai lalu iya tau ngerapitka kaul ti menyana entara kitai. Kaul tu rat tu ukai semina entara kitai bansa Iban aja tang enggau bansa bukai. Pengaya adat basa ti dikembuan bansa kitai deka ngasuh bansa bukai rindu ati begulai enggau kitai.

            Kategori ti ketiga iya nya Main Asal Invokasyen iya nya leka main ti bekaul enggau pengarap Iban sereta ngelebihka pengawa ke bisi kaul enggau Petara baik iya maya gawai ti bekaul enggau umai, lebuh ngubat orang ke sakit tauka lebuh bisi pemati. Leka main ti disebut dalam tusun invokasyen tu ngerintaika bansa main asal ti dikena ngangauka Petara. Main asal Invokasyen  nyengkaum sida Sampi, Biau, pengap, Sabak, Pelian, Timang, Renung, Sugi Sakit, Pelandai Sakit enggau ti bukai. Enti ngesuhka main asal invokasyen tu maya gawa, iya mesti disempulangka enggau Piring Ading. Ari leka main invokasyen tu, dia dih bansa kitai Iban endang iya nyata bendar beserakup ketegal ti ngembuan pengarap ti sebak dulu kelia. Kemaya hari tu, bansa Iban  mega agi meruan bejalaika leka main invokasyen tu laban tu mih ti nyadi penulin diri bansa kitai Iban.

Reti Fonetik Enggau Fonologi

Leka jaku fonetik enggau fonologi nya dua pekara ti nyau deka sebaka ari aspek reti. Taja pia, iya nyata bendar bisi bebida mimit entara pangan diri (Nik Safiah et. al). Fonetik manggum reti pansik munyi jaku ti diasilka organ artikulasyen. Reti nya fonetik mansik produksyen enggau persepsyen munyi jaku. Fonetik ulih dibagi ngagai tiga bansa iya nya fonetik artikulasyen, fonetik akuistik enggau fonetik auditor. Fonetik begunaka pengawa mansik tiap-tiap leman munyi, lalu ngasilka transkripsyen ungkup tiap-tiap munyi ari semua jaku.

Kereban Artikulasyen

Fonetik artikulasyen tu mansik chara sesebengkah munyi diasilka rengka artikulatori ba tubuh mensia. Endur munyi nya diasilka disebut palan artikulasyen ti beguna ngeluarka munyi jaku. Bisi munyi nya nyaris, mantik, begetar lalu bisi mega semina meresu aja. Ruang alai angin tu ngelebus ke luar ari dalam tubuh kitai nanya tau disebut ruang sada iya nya ruang endur angin nabanka munyi ti pansut ari organ artikulasyen ba tubuh kitai mensia. Fonetik akustik tu sebengkah bidang penemu ti mansik munyi jaku kitai. Bidang tu mansik gelumbang angin ti mai munyi nya ngagai pending mensia. Tu mai reti bidang fonetik akustik tu mansik klasifikasyen  munyi ti pansut ari mulut kitai iya nya ari aspek fitur baka empas munyi, pengelantang munyi enggau pemanjai munyi sebut.

Fonetik auditori tu bekaul enggau pekara mending enggau proses ti nyadi lebuh kitai nerima munyi lalu baka ni munyi tu diasai tauka didinga kitai. Fonetik auditori tu mega bekaul enggau perengka tubuh ti bukai baka untak enggau pending. Nangkanka nya, bisi beberapa bengkah pekara ti bekaul enggau proses mending iya nya gelumbang, ruding pending, bagi tengah pending, jenila pending, getar munyi, penerang ti didinga, untak enggau peninga empu.

Nangkanka nya, fonologi siti ari bidang ti mansik sistem sekeda munyi dalam sesebengkah jaku mensia. Bidang fonologi nyimpul, betungkapka lalu bebidaka tukuh munyi jaku sesebengkah jaku dikena nentuka atur enggau tukuh sekeda munyi jaku nya. Fonologi mega nerangka pasal sekayu munyi ti diasilka mensia, betungkap lalu nyerita pasal sistem munyi semu jaku ti dipansutka, sekalika disebut mensia enggau betul tauka enda. Fonologi mansik sistem munyi sesebengkah jaku mensia sereta negika tukuh asal sistem munyi jaku nya. Bidang tu mega betungkapka kaul entara beberapa leksikal nirika ayat. Fonologi megai siti da agi tanggung pengawa iya nya mansik pola entak sebut tauka intonasyen. Ari leksikal enggau pola entak sebut tu mih ke ulih ngasilka sistem sepil sesebengkah jaku (Padang & Chemaline, 2011).

Buah Runding Tebangkar Dalam Linguistik

     Konsep buah runding dalam linguistik nerangka bakani penemu baru enggau jalai jaku dipejuraika bala tebangkar linguistik (Hornby, A.S. 1995). Disimpulka enggau pandak agi, buah runding dalam linguistik lebih agi difokuska ngagai penemu tauka aliran ke dititihka bala tebangkar jaku nya. Bisi dua bengkah penemu ti bekaul enggau linguistik ti dititihka bala tebangkar jaku iya nya relativiti linguistik (linguistic relativity) enggau determinisme linguistik (linguistic determinisme). Kedua-dua bengkah penemu tu bekaul enggau jaku sereta buah runding. Sekalika jaku tu meri empas ngagai buah runding orang ke nguna iya tauka buah runding orang ke nguna jaku nya ti meri empas ngagai jaku ke dikenataika sida. Utai tu mih ti deka dipejuraika bepelasarka buah runding dua iku tebangkar jaku dalam linguistik. 

     Bisi dua iku tebangkar ke bebida penemu senentang linguistik tu iya nya Edward Sapir enggau Leonard Bloomfield. Buah runding dalam linguistik Edward Sapir mayuh agi ngemeratka kaul entara pansik jaku enggau antropologi sereta nekanka senentang daya idup (culture), sastera, agama (beliefs) enggau mitologi (Faridah Nazir, 2013). Siti ari pansik iya ti tebilang iya nya Hipotesis Sapir-Whorf iya nya asil buah runding seduai iya nembiak iya, Benjamin Lee Whorf ti madahka buah runding enggau pemai ulah siku-siku orang nya ditentuka jaku ti dikena. Seduai iya udah mantaika kaul entara jaku, buah runding enggau daya idup. Dua bengkah teori ti dibantaika Sapir iya nya;

(i) teori linguistik determinisme ti madahka jaku ti dikena kitai nya nentuka bakani kitai deka mantaika interpretasyen dunya ti ngelingi kitai enggau
(ii) teori linguistik relatif (relativisme) ti madahka jaku ngembuan biuh mimit dalam nentuka runding kitai senentang dunya. Sapir chukup ngemeratka kaul jaku enggau daya idup sereta runding orang ke ngena jaku nya.

     Buah runding Sapir tu bebida enggau Bloomfield laban Bloomfield lebih agi ngemeratka buah runding ti mai biuh ngagai jaku ti dikena kitai. Sapir mantaika fonem ti nyadi sakum psikologis (tikas runding tauka chara berunding) tang Bloomfield madahka jaku fonem nyadi sakum behaviorial (pemai ulah). Reti iya ditu, jaku ti dikena kitai ditentuka kati chara kitai berunding enggau pemai ulah kitai (R.H Robins, 2003). Bloomfield lebih agi nekanka jaku nya nyadi pengkalan data sebut ti ulih mansutka semua unit jaku nengah chara ayat-ayat ti deka disebut nya disusun ba untak lalu disebut lebuh bisi nerima stimulus (ransangan). Nitihka Bloomfield, nyema pemai ulah nyadi enti bisi stimulus, jaku mega ulih nyadi respons ngagai stimulus nya tadi (Faridah Nazir, 2013). Jaku nya siti ari pemai ulah mensia lalu tu bebida enggau penemu Sapir ti madahka jaku tu ti nentuka runding enggau pemai ulah mensia.



Sanding Penemu:

Faridah Nazir & Tuan Jah. (2013). Pengantar Linguistik Bahasa Melayu. Selangor: Penerbitan

                 Multimedia

Parker F. & Riley K. (2005). Linguistics For Non-Linguists. USA: Pearson

Nor Hashimah Jalaluddin, Mohd Fadzeli Jaafar & Harishon Radzi. (2009). Kepelbagaian 

               Dimensi Linguistik. Selangor: Universiti Kebangsaan Malaysia

Robins R.H. (2003). Sejarah Ringkas Linguistik. Kuala Lumpur: Dewan Bahasa dan Pustaka

Asal Penatai Bansa Iban

     Nitihka diksyenari Iban ti ditulis Anthony Richards dalam taun 1981, leka jaku “Iban” tu datai ari jaku bansa Kayan hivan tauka divan tauka Iban. Dalam jaku Kayan, hivan tu bisi tiga reti. Keterubah, reti divan nya ‘menantu’. Nya alai sida ngangauka menantu sida iya hivan, baka kitai ti nyebut ‘wat’ tauka ‘igat’ tauka ‘dom’. Kedua, reti hivan/Iban tu dalam jaku Kayan iya nya ‘orang ti agi biak’ ari sida iya sekalika bansa sida Kayan empu tauka orang ari bansa bukai. Reti hivan/Iban ti ketiga dalam jaku Kayan iya nya ‘anak temuai’ tauka ‘anak orang datai’ tauka ‘anak kampar’ (nyengkaum sida ti datai tesat) ti bisi rembus tauka datai nemuai ngagai rumah sida di menua Kayan din. Ba sekeda menua ke diwan bansa Kayan baka Batang Rajang enggau Batang Baram, bansa Iban endang amat dudi datai di menua nya ari sida Kayan. Nyangka nya mih bansa Kayan tu ngumbai Iban tu ‘anak temuai’ tauka ‘anak orang datai’ tauka ‘anak kampar’. Baka nya mih sekeda kenang pasal penatai leka jaku “Iban”.

     Kitai Iban ngachir sebarang alai ba sekayu menua Sarawak tu lalu dikelala nitihka ai tauka faktor geografi. Nya kebuah sekeda kitai ngumbai diri ‘kami Skrang’, ‘kami Saribas’, ‘kami Batang Rajang’, ‘kami Lemanak’, ‘kami Remun’, ‘kami Sebuyau’, ‘kami Undup’ enggau ti bukai. Ketegal tu mih jaku kitai bisi nyelai tauka besibil mimit ari pangan diri lalu tu mih ti nyadika identiti sosial kitai. Nitihka pansik ti dipejalaika Sather (1994), pekara tu mih kebuah kitai ngembuan penyelai mimit ba sukut adat enggau jaku. Nyadi kitai Iban diau ngachir serata Sarawak chunto iya raban bansa Balau enggau Undup di Batang Lupar enggau Batang Ai; Iban Sebuyau ba Sungai Sebuyau semak genturung pendiau orang bansa Dayak Bidayuh; Iban Remun ti mendam di menua Serian ba sitak Sadong; Iban Dau diau semak Sungai Klauh, enda jauh ari Bukit Kelingkang; Iban Saribas ngidupka diri ba menua Layar, Paku, Padeh, Rimbas enggau Entanak lalu sekeda ngachir pendiau ngagai Krian, Julau, Kanowit, Sarikei enggau Batang Rajang. 

     Kitai Iban mega bisi ba menua Kalimantan. Ba Kalimantan din bisi tiga raban bansa Iban ti besai iya nya Iban Kanyau, Iban Merakai enggau Iban Danau. Nitihka pansik orang linguist, Iban Kalimantan bisi enda kurang ari sepuluh bengkah dialek Iban iya nya Sebaru, Seberuang, Desa, Demam, Bugau, Ketungau, Mualang, Kantu, Kantormai enggau Inggar-Inggar. Pemayuh kitai Iban ti nguan menua Sarawak tu dipelabaka bisi 600,000 iku. Iban makin betambah mayuh lalu mansang mega dalam tikas pengidup.

     Sebedau bansa Iban ngentap ba menua Sarawak, dulu agi bansa Iban ngangkatka diri ari menua asal Iban kelia. Asal penatai kitai Iban ti bendar enda tentu temu enggau terang. Sida ke tuai semina nemu kitai bansa Iban datai ari Kapuas, Indonesia. Kenu ko pansik orang ke landik pasal mensia, kitai Iban datai ari Yunnan di menua China. Ari Yunnan pindah ke Indochina. Ari Indochina pindah ke Malaya. Ari Malaya pindahka Sumatra lalu ngujung ke Iban pindah ke borneo laban enggai ke ajar pengarap Islam. Nambahka nya, bisi kena pansa leka pengap ti madahka kitai kala diau di menua Kamuja (Cambodia) lalu lari ketegal bansa Kemarau (Khmer Rouge).

     Siti agi pansik madahka bansa Iban tu datai ari semak Makkah di Timur Tengah, sebedau pindah ke Sumatra. Ari Sumatra Iban pindah ke Borneo, napatka Batang Kapuas sebedau pindah ke Sarawak. Taja pia, bisi mega raban bansa Iban ke ukai datai ari Kapuas. Raban sida nya diuluka Sabatin enggau anak iya Drom. Sabatin datai ari Timur Tengah lalu diau di Tanjung Datu di Borneo. Uchu Sabatin, anak Drom ke benama Sera Bungkuk Ketuk Tunjuk Penebuk Tiang Tembang nurun ke bansa Iban enggau bansa Beketan di Sarawak nitihka tusut tuai. Sabatin mega bisi anak siko benama Senaun, beranakka Tugau lalu nurunka bansa Melanau Rajang tauka Tanjung.

     Naka ke diatu, nadai pansik ke pengambis iya silik lalu nyengala senentang raban bansa Iban kebendar iya udah dipejalaika. Taja asal kitai Iban tu dipadahka ngena mayuh macham teori tang nadai udah ditemu bisi bup tauka dokumen ti nyemetak ke nerangka asal penatai bansa Iban ke bendar. Nya alai, kereja kus tu digaga aku dikena ngelansa sekeda kenang, teori sereta penemu antropologi ti udah dipejalaika jeman menya. Pansik ti digaga aku tu senentang sejarah asal bansa Iban ti mungkur pengangkat enggau pengentap sida sereta nyengkaum sejarah pemansang jaku Iban belabuh ari jeman Perintah Brooke nyentuk ke diatu, nyengkaum Akta Pelajar 1996.

Jaku Iban Nadai Ganti

Jaku Iban badas memelan nyampau dikenang

Ditiu Iban Lundu nyentuk ke Limbang

Dikemesaika Iban Brunai ti nurun mansang belelang

Dikemegahka Iban Sabah nyadika lambang

Dikelala Iban Indonesia nyentuk ke Empanang

Jaku Iban mayuh bansa jaku

Jaku injau jaku iru

Jaku klasik jaku baru.

Jaku Iban anang diserarih enggau jaku pinang sirih

Laban nya jaku dikena besehari-sehari

Jaku pinang sirih sebansa jaku Iban

Dikena bala raban orang ulu

Disebut bansa Laut

Dikelala bansa China

Dipereti bansa Tambi.

Jaku injau jaku iru

Nadai salah diambi diempu

Dikena ngaya ngerajaka jaku penemu.

Tang anang bangat kelalu udu

Enggaika ila nyau baka kara

Tau ngalahka kah galau temesu

Meragai parai lalu merentum nyadi punggu.

Nama penyadi enti padam sedu

Nesal dudi dini kala dulu.

Leka main asal nyau enda tentu dipelajar nembiak rebak dudi

Laban mayuh leman pemerindang bukai nyadika ganti.

Timang enggau pengap majak enda dikeingat

Laban bala lemambang mayuh udah ruat

Tinggang urat sebangki api.

Ensera enggau pelandai nyau jarang dikana

Laban anak Iban rindu agi nyulik telipun nunga komputer 

Anang enda betati ke jaku diri

Enggai ke ila ditabanka arus liri

Jaku diri nyau lus nadai ganti

Nama penyadi kitai dih menyadi?

Nesal dudi sigi nadai reti

Nya alai

Dikelala bungai ari kayu

Dikelala buah ari langgu

Dikelala ulah ari penuyu

Dikelala perangai ari penau

Dikelala pengidup ari pengelusu

Dikelala basa ari penyiru

Dikelala bansa ari jaku.