“Rayat Diseridi, Pemujur Dipelemati’’
Menua kitai Malaysia chukup nyelai ari menua bukai di dunya tu ketegal ngembuan mayuh pupu raban bansa ke diau segulai sejalai sereta ngembuan kaul ti chukup tegut enggau pangan diri taja pan bebida adat enggau pengarap. Nengeri kitai Sarawak aja udah ngembuan 35 etnik ti diau segulai sejalai tajapan bebida adat enggau daya idup. Dikena negutka kaul ati entara pupu raban bansa menua tu, bemacham-macham chara udah dipejalaika perintah menua Malaysia. Menteri Besai menua Malaysia, YAB Datuk Seri Najib Tun Abdul Razak siku ari orang ti chukup ngemeratka penegut kaul ati rayat menua tu dataika iya ngadaka kosep 1 Malaysia ti beselaingka jaku baka ke ba atas nya.
Nyadi, kitai rayat Malaysia tu patut ngambu diri nyadi raban bansa ti nemu bepikir sereta bepadu nuju siti juluk ati menua. Enggau nya, kaul antara kitai ulih dikemansangka agi ngambika menua kitai Malaysia tu majak maju, likun sereta meruan. Penyerakup menua Malaysia ti diuan mayuh pupu raban bansa balat amat ngalitka ati rayat ari menua bukai laban kitai ti diau ba menua Malaysia tu agi ulih idup enggau lantang sereta enda beperang. Taun tu udah manggai 58 taun menua Malaysia ditumbuhka tang rayat menua Malaysia semampai ngemeratka penyerakup enggau pangan diri taja ngembuan adat, pengarap enggau jaku ti bebida. Pengawa ti beserakup tu senutuk bendar enggau juluk ati Menteri Besai Malaysia keempat, Tun Dr. Mahathir Mohamad ba kenyap mimpi iya ti dikumbai Tinjau Pemansang Taun 2020.
Chara ti engkeman bendar dikena ngerapatka kaul ati entara pupu raban bansa menua tu, kelebih agi ba nembiak sekula iya nya bejalaika kurikulum ti sebaka sereta enda bechipingka siti-siti raban bansa. Kurikulum pelajar sekula ukai semina ngemeratka pengelandik tang mega ngajar bala nembiak adat-adat basa ti tinggi ngambika sida sama bela bebasaka pangan diri sereta orang bukai. Subjek ‘Pendidikan Moral’ sereta subjek ‘Pendidikan Sivik dan Kewarganegaraan’ ke benung dipejalaika ba semua sekula primari enggau sekondari di serata menua Malaysia chukup nyemetak bendar enggau juluk ati perintah ti deka negapka agi kaul ati entara pupu raban bansa. Kebuah pia laban bala nembiak sekula diajar sereta dilatih enggau adat basa ti ukai semina kena sida peresa aja tang nukuka sida rebak baru ti ngembuan pengangkun ngagai menua diri sereta pemesai guna penegap kaul ati dalam ngemansangka menua kitai Malaysia.
Kelimpah ari nya, sekula patut chakah agi ngatur program-program ti ulih nelebaka bala nembiak sekula awakka semampai beserakup. Siti ari program ti ulih nelebaka bala nembiak sekula awakka semampai beserakup enggau pangan diri nya program Rancangan Integrasi Murid Untuk Perpaduan (RIMUP). Perintah menua Malaysia udah ngatur program Rancangan Integrasi Murid untuk Perpaduan(RIMUP) tu berengkah ari taun 1986 tang program baka tu enda entu dikemeratka agi ba sekula. Program baka tu mai mayuh amat empas ti manah ngagai kaul pupu raban bansa ba menua tu. Program baka tu ulih nelebaka bala nembiak ngambika semampai begulai enggau pangan diri enda ngira bansa. Bala nembiak deka bebasaka pangan diri lalu enda ngeleseka adat bansa bukai lalu bala nembiak sekula tu tadi deka semampai ngembuan ati ti manah sereta enda ngembuan penanggul bekempit enggau pangan diri ari bansa bukai nyentukka sida tuai. Nya alai, sekula patut chakah agi bejalaika program baka tu awakka ulih mansutka raban nembiak ti ngembuan ati ti semampai deka beserakup enggau pangan diri.
Perintah mega patut ngemeranka tiap iku nembiak ti udah ambis pom 5 ngambi bagi ba Program Latihan Khidmat Negara (PLKN). Ari program ti baka tu, bala nembiak enda mudah tepawah ngereja pengawa ti enda menyana baka nginsap, enchuri enggau ti bukai. Program ti baka tu mega ulih mansutka raban nembiak ti ngembuan ati begerempung enggau bebasaka pangan diri. Dalam timpuh 3 bulan program tu dipejalaika, bala nembiak ulih begulai enggau bansa bukai makai, bemain sereta ngereja aktiviti besari-sari. Program tu suah agi magi nembiak dalam kumpulan ti raban ari bansa bukai awakka ulih nelebaka diri begulai enggau pangan diri ari bansa bukai. Program tu ulih ngajar bala nembiak awakka semampai ngayanka penyerakup ati begulai sereta bebasaka pangan diri. Perintah enda patut milih sekeda aja ari bala nembiak ti udah abis pom 5 enggau ngambi bagi ba program baka tu tang sida patut meri awak ngagai semua nembiak ti udah ambis pom 5 enggau program tu awakka penyerakup pupu raban bansa ba menua tu ulih ditegapka agi laban bala nembiak rebak baru tu mih ti deka ngetan penyerakup pupu raban bansa ba menua tu munyi jaku sempama baka rutan tampung danan, baka ijuk tampung penduk, baka wi tampung tali. Enti sida tu diiri enggau runding ti semampai deka ngenan sereta negapka penyerakup pupu raban bansa ba menua tu, menua kitai ti diuan mayuh pupu raban bansa deka semampai likun sereta nadai penyarut ti ulih nuntung.
Ari sukut ke besai agi, perintah ulih ngatur rumah tebuka beserimbai enggau pengerami ti bisi diintu pupu raban bansa ba menua tu baka Hari Raya Aidilfitri, Tahun Baru Cina, Hari Deepavali, Hari Gawai Dayak enggau iya ti bukai. Bala mayuh ari raban bansa bukai ulih sama ngasai nyambut pengerami bansa bukai alai sida sama duduk makai, ngabang berandau enggau pangan diri lebuh rumah terbuka diatur. Bala ketuai menua mega ulih sama datai ngabang lebuh rumah tebuka diatur. Taun tu tadi, Menteri Besai Menua Malaysia kitai bisi sama datai ngabang begulai enggau bala rayat ba rumah terbuka Hari Raya Aidilfitri ti diatur Gerempung CIMB. Penemuai Menteri Besai Menua Malaysia kitai ngagai rumah terbuka tu ukai semina ulih ngerapitka kaul enggau bala rayat tang mega ulih ngerapitka agi kaul pupu raban bansa ti bisi ba menua tu laban pemanah kaul menteri kitai enggau bala rayat ulih nyadi chunto ngagai bala rayat awakka semampai nyaga sereta ngerapitka agi kaul enggau pangan diri enda ngira bansa enggau pengarap.
Pia mega, pengawa begutung-ruyung patut diatur enggau suah agi laban pengawa begutung-ruyung begunaka sukung ari mayuh orang. Pengawa begutung-ruyung ulih diatur ba palan endur kitai diau. Kitai bela nemu ukai semina siti bansa aja ba palan endur kitai diau. Kitai bisi menyadi kitai ti bansa Melayu, Cina, India, Iban, Kadazan, Bidayuh enggau ti bukai ti diau ba sepiak-sepiak kitai. Lebuh kitai begempung enggau bansa bukai ngambi bagi dalam pengawa begutung-ruyung meresi kandang endur diau kitai, kitai ulih bekelala enggau pangan diri, betanyaka berita pangan diri lalu tu meh ulih ngepunka penyerakup kitai enggau bansa bukai ti diau semak enggau kitai lalu kitai mega ulih nyadi ‘role model’ ngagai bala nembiak ke agi mit ngambika sida mega deka beserakup begulai enggau bala kaban ari bansa bukai. Enti nyema semua orang ngereja pengawa ti bansa tu, penyerakup pupu raban bansa ba menua tu deka ditegapka agi.
Penyerakup pupu raban bansa nya mih senyata lumur satu dikena nempa menua Malaysia ti mansang sereta nyapai Tinjau Pemansang 2020 ti nyauka datai. Semua kitai patut ngambu diri raban menua Malaysia ke alai kitai patut bela ngasaika semua penyenang enggau pengelantang tu. Pemujur pupu raban bansa ba menua kitai Malaysia tu amat patut nyadika chunto awakka raban rebak baru ulih ngemansangka agi menua tu. Ila, menua kitai tu dipuji orang menua bukai enti kitai udah maju bendar. Rayat ke udah mujur mega patut bekunsika mayuh macham pekara ukai semina informasyen sereta modal tang mega adat enggau pengarap ari menua bukai. Semua rayat Malaysia patut meretika prinsip 1 Malaysia nya ‘kekitaan (togetherness)’ sereta ‘kekitaan (sense of belonging)’ ngambika semua utai tu mujur dipejalaika nitih semua ti udah diperambu kitai.cTiap iku rayat Malaysia patut enda belampung ati lalu sama bela betulung enggau pangan diri awakka menua Malaysia semampai likun lalu ulih datai ba adan pemansang ti tebilang sereta tampak rita enggau nama ba menua bukai.
